Lembro, abofé, a nosa visita ás Burgas, as termas, famosas dende o tempo dos romanos. Nun dos mananciais atopamos pracer: abrollaba dun muro de granito, por baixo dun arco decorado con esculturas e, nuns tanques que recollían a auga que escorregaba, as mulleres lavaban a roupa branca. Pero na veciñanza dos outros dous mananciais, nun tanque escaldaban e depenaban aves de curral e noutro cociñaban carne na auga irada. Preto de alí hai carnicerías e por todas partes había carcasas, que as mulleres esfolaban e limpaban, cos cheiros e as cores dos refugallos dun matadoiro. E toda esta mestura fedorenda era un fervedoiro: xente rebulindo decontino, mulleres metidas ata o nocello en auga sanguinolenta, voces acedas bradando, a batuxada dos recipientes baleirados… e había tamén risas e notas dunha canción que rubían de entre o medio das mulleres, como as burbullas de vapor que escapan dunha pota cando ferve.

CATHERINE GASQUOINE
Spain Revisited: A summer holiday in Galicia, 1911