No Museo Etnolóxico de Ribadavia consérvase un tesouro para todo amante da historia da fotografía: a colección Foto Chao. Iniciada arredor de 1870 por Serafín Rodríguez, é unha oportunidade única para mergullar no pasado da comarca e das súas xentes. Escenas da vida cotiá tomadas ao aire libre coa propia cidade como decorado. O único que cambia conforme avanzan as décadas son os seus protagonistas e as técnicas empregadas: da albumina e a placa fotográfica ao negativo de 35 mm e a filmina. Retratos entrañables tomados grazas á profesionalidade dunha saga de fotógrafos que non cesou no empeño ata o ano 2005.